Last Night in Soho

Last Night in Soho ★★★★½

تجربة ممتعة بكل تفاصيلها و مازلت عند رأيي إن كل ما الكلام بيقل عن العمل قبل إصداره بخلاف الأفلام التجارية البحتة ، بيكون المشاهد في حالة من الإستعداد النفسي لتقبل العمل بشفافية وموضوعية وإعطاءه حقه وقيمته بدون ضغوط مجتمعية أو مؤثرات إعلامية .

ممكن نعتبر الفيلم توثيق من إدجار رايت بإكتمال نضوجه الفني ، واعتقادي الشخصي إنه بكده صعب الموضوع علي نفسه وعلينا، لإن تكامل التجربة صعب تكراره.

الفكرة : حد علمي إن إدجار مش صاحب أفكار اصلية بس متاكدة إنه بيجيد إعادة تدوير الأفكار دي لحد ما المخرجات أو بمعني ادق المنتج النهائي بيكون أصلي وغير مسبوق كمان ......

معظم افكار الفيلم مكررة سواء إزدواج الشخصيات او السفر عبر الزمن او جنون الموضة أوسحر المزيكا بس تقديمها وتصاعدها وتحورها كان مبتكر جدا ، ما اعتقدش إدجار عاجز عن إستحضار افكار مبتكرة لكنه بيختار الطريق الأصعب من خلال جذب وإستحضار جمهور بفكرة معتادة لكن بطرح مغاير لما تم توقعه او الإستعداد له لينتهي الأمر بتجربة مبهرة علي جميع الأصعدة.

الأجواء العامة : الفيلم احداثه بتبدأ هادية وشاعرية بخلاف تمهيد سريع وخاطف مش بيتداركه جميع المشاهدين ، بتتطور الاحداث بشكل متوقع ومازال هادي ولكنه مزعج بعض الشئ ، بعد كده الأحداث بتبتدي تتصاعد بالشكل اللي توقعه المشاهد بالظبط وهنا بيبدأ المشاهد في الإطمئنان والتسليم وبيقدر يحقق تواصل بنسبة مرتفعة جدا ، فجأة وبدون أي مقدمات بيتدخل إيدجار بموهبته الغير عادية وبيخلق أجواء من نوع خاص جدا وبيكون متأكد وقتها إن المشاهد ليس لديه اي خيارات في الرفض أو القبول ، ولكن في المقابل بيتعهدله بمنتج نهائي هايرضيه ويحترم عقليته ......كل ده بيحصل بسلاسة غير عادية مش بيدركها المشاهد غير بعد إنتهاء الفيلم لما يسترجع الأحداث بأثر رجعي.

المزيكا كانت عالم متكامل وإطار قدر يحول كل مشهد للوحة فنية ساحرة ، وأكيد الكل هايخرج من الفيلم ببلاي ليست هاتتطول معاه

البرودكشن ديزاين كان من أهم العناصر الفنية وقام بدور فعال جدا في إنتقال المشاهد بين الأحداث والأزمنة والأماكن والأشخاص والخيال والواقع بإنسيابية عبقرية غير ملحوظة بقدر مرونتها .

الملابس والألوان توظيفها كان بديع وكان لها دور في إحتواء الأبطال و إندماجهم و إبراز ملامحهم وإنطباعاتهم و ردود افعالهم وكأنها أقواس بتنظم تدفق السرد وعشوائية المنظومة.

السينماتوجرافي كانت بتنافس أداءات آنيا تايلور وتوماسين وساعات كانت بتحاول تخطف الأنظار من عليهم ، كانت ضلع الزاوية القايمة في مثلث إستعراض قدرات إنتهي بفوزهم جميعا في المراكز الأولي.

أكيد مش هاتكلم عن الإخراج لإن المايسترو مش محتاج إشادة

قايمة ببعض الأفلام اللي إتأثر بيها إدجار رايت في إخراجه للفيلم

Sarah_Ali liked these reviews

All